المكونات
- 2 ثمرة باذنجان أو قرنبيط (ممكن تعمليها بالباذنجان والقرنبيط مع بعض.)
- 1,5 كيلو لحمة ضانى
- 5, كيلو أرز
- 1 ملعقة شاي قرفة
- 1 ملعقة شاي فلفل اسود
- 2 ملعقة شاي قرنفل
- حبهان
- 100 جرام مكسرات
- 100 جرام زبدة
- 1 عود زعفران
- 5, كيلو طماطم
- زيت للقلى
- ملح
طريقة عمل المقلوبة الفلسطينية
- تقشرى الباذنجان وتقطعيه بالطول أو دواير. وبعدين تنقعيه فى ميه بملح (علشان مايشربش زيت كتير )، وبعدين تقليه لغاية مايبقى لونه ذهبى. ” تحطى الباذنجان على مناديل مطبخ علشان تشرب الزيت “
- تغسلى اللحمة ( أو الفراخ) كويس بمية من الحنفية، وبعدين تحطيها فى حلة فيها ميه ونحط عليها الملح، القرفة، الفلفل الاسود، القرنفل، والحبهان. بعدين تسلقيها على نار هادية، وكل شوية تبصى عليها وتشيلى الرغوة من فوقها. تسبيها على النار لغاية ما تستوى خالص وبعدين تشيلى اللحمة وتحطيها فى طبق لوحدها، وتخلى الشورب علشان هاتستخدميها بعدين.
- نغسل الأرز بمية من الحنفية ونسيبه منقوع فيها لمدة 10 دقايق، وبعدين نصفيه. وبعد كدة نجيب حلة مش غويطة قوى ونحط فيها المكونات بالترتيب ده: -1- نغطى قعر الحلة بشرايح طماطم. -2- نحط اللحمة (أو الفراخ) وفوقها نحط شرايح الباذنجان (أو القرنبيط). -3- وبعدين نحط الأرز و نسقيه بالشوربة لغاية ماتكون الشوربة فوق الأرز ب 2 سم (أو عقلة صباع). -4- فى الأخر نحط الزعفران على الوش.
- تغطى الحلة وتحطيها على نار عالية لغاية ما تغلى، وبعدين تهدى النار وتسيبى الحلة عليها لمدة 25 ل 30 دقيقة بالكتير قوى، وبعدين تقفلى البوتاجاز وتسيبىها كام دقيقة كدة علشان تبرد شوية. بعدين تقلبى الحلة فى صينية كبيرة (قطرها يكون اكبر من قطر الحلة). وبعدين ترفعى الحلة بشويش من على الصينية علشان تفضل واخدة شكل الحلة، وبعد كدة تشيلى شرايح الطماطم، وتسيحى الزبدة وترشيها عليه من فوق بشكل دائرى وبعدين تزينيها بالمكسرات.
- تقدم مع سلطة زبادى بالخيار والنعناع.
