فى بولة هنضيف البطاطس المبشورة ومهم جدا تكون باردة وبيضة واحدة مضروبة وكوب دقيق ونعجن كويس أوى, لو العجينة ممسكتش هنزود الدقيق بالتدريج لحد ما تمسك, ولو العجينة بدأت تنشف هنحط البيضة التانية.
فى الأخر العجينة المفروض تكون صلبة شوية, هنكورها ونحطها على صينية مفروشة بالدقيق.
هناخد قطع من العجينة ونفردها على شكل حبل طويل حوالى 40 سنتيمتر وهنغطيها بالدقيق واحنا بنشكلها.
بعد كده هنقطع حبال العجينة قطع صغيرة وهناخد القطع الصغيرة دى قطعة قطعة ونضغط عليها بصباعنا نخليها مسطحة قليلا ونلفها من الطرف بحيث تكون ملفوفة على بعضها شوية علشان تدى شكل جمالى, أو ممكن نعمل نفس الحركة دى على الوجه الخشن من المبشرة علشان سطح العجينة يكون منقوش.
بعد كده فى حلة على النار هنغلى ماء, و أول ما يغلى هنضيف معلقة زيت ورشة ملح وبعدين نضيف قطع المكرونة.
أول لما قطع المكرونة تطفو على سطح الماء تبقى استوت وهنخرجها مباشرة على طبق التقديم ونضيف عليها الصوص حسب الرغبة وبالهنا والشفا.
